Novel Part-4 (Last)

Is waqt Kargill ki barf posh pahariyoon may qiyamat sugra ka sama tha. Kauf o hiras may shiddat say izafa ho chuka tha..... aur aay ruz gola bari may shiddat aati rahti thi. Bharati sarkar apni fazaiah ko bhi jang may jhonk chuki thi jo chand lahzoon k liye faza may baland ho jatai aur bombari kar k chsham-e-zan may gaiab ho jatai thay.
Tiger Hill ki bunyad ne achnak Bharati faujion k andar ek kauf-o-hirras phila diya tha ek kam hi arsay may har taraf kai darjan Post qaim huay thay. Aur har Post par Captain Rehman, Colonel Shair Khan aur company hawaldar major Lalak Jan jaysay pur’azam aur jarri officer maujud thay. Jinhoon ne kam hi waqt may dushman k sath du du hath kar k kai aham morchoon par qabzah jama liya tha.
Captain Rehman aur Captain Colonel Shair Khan ne jang ka pansa hi palat kar apnay haq may kar liya tha. Wo log aay ruz Postoon ki tadaad may izafa kartai aur tadaad ghatai rahtai thay . jis say dushman ruzbaruz pechhay hatta jata tha.
Yun to har muhaz har waqt pur’khatar rahta tha lakin raat k waqt is ki shiddat may izafa ho jata tha aur din k waqt is ki shiddat may khasi had tak kami aa jati thi.... yun din k waqt Captain Rehman aur Captain Colonel Shair Khan ka apas may set k zariay rabita rahta tha aur yih log har waqt naay imkanaat aur khadshaat par gaur kar k koi nah koi hikmat amli waza kartai thay.
Captain Rehman apnay upar aur nechay dushmanoon ki Postain dekh kar khasa mutmain tha. Dushman k darmiyan ghiray rah kar dushman par war karna aur unhain shikast-o-rikhat say duchar karna is ka darena khwab tha. Wo is bat ka intizaar nahi karta tha kih dushman ne hamlah kya tab jawab diy balkah kabhi kabhi wo khud apnay jawanoon k sath Post khali kar k nikalta tha aur dushman par war kar k achchha khasa jani aur mali nuksan kar k wapas aata tha...
Tiger Hills may is ne kai barray kamiyab operation kiay thay. Jis ki wajah say dushman k diloon par is ki dhaak baith chuki thi.... is wajah say wo is k Post par hamlah karne ka khatra mol nahi laytai thay. Aksar is wajah say Captain Rehman ko du du hath karne ka mauqa nahi milta tha aur jis ki wajah say wo kafi boreiat mahsoos karta tha.
Jabkih itaraf ki Postoon may achchhai khasi mud bhir rahti thi. pichhli raat ko dushman ne achanak Kashif Post par hamlah kya.... Captain Wasim aur Hawaldar Major Lalak Jan ne achchha defa kia aur dushman ko pichhe dhakal diya.... is say aglay ruz phir dushman ne bharpur adadi aur askari taqat k sath Kashif Post par hamlah kar diya. Kashif Post par adadi taqat Chhah ya sath Sipahioon par mushtamil thi is liye wo zada deir dushman ki bharpur adadi aur askari taqat k samnay nah tahar sakay.... Captain Waseem ko khudsha tha kih wo apni Post ko bacha nahi sakay ga... is ne Hawaldar Major Lalak Jan say apna khadsha zahir kia to barud ki bocharr may bhi ek chataan ka azam lay kar bola.
“ Mujhay apni position ka a’lim hai sir , lakin is k bawujud is Post say mujhay itni muhabat hai kih apni shahadat say phalay is ko kabhi nahi chorr sakta .”
Lalak Jan ne is ki taraf tawajah diya bagair apni may magzine daltai huay kaha...... is say phalay kih wo dubarah aa kar apnay target ko hit karta, faza may ek bharpur brust ki dashat ubhri aur phir Lalak Jan larkh kar zameen par aa raha.
Captain Waseem ne keesi karb k sath usay zameen say utha liye.... aur faisala hua kih usay nechay bhaija jaay. Hawaldar Major Lalak Jan ne nafi may sir hilaya aur aysay uth kar dubarah inhi aarr may aa kar sedhi kar li kih usay kuchh hua hi nahi tha.
Tab Captain Waseem ko shiddat say yih ahsas hua kih itnay jarri Sipahioon k bawujud Post chorrna darasal himaqat say kam nahi hai..... is ne jagah say dekha to Hawaldar Major Lalak Jan nakhahat k bawujud dushman par fire daag raha tha.
Lakin.......
Ajal k waqt qarib aa chuka tha. keesi janib say ek aur brust aaya aur Lalak Jan ab ki bar zameen par gir kar dubarah nah uth saka...... Captain Waseem ne qarib aa kar is ka sena tatola to is may jan baqi nahi bachi thi..... Post par Lalak Jan k bad sirf wohi bacha tha.
Ab wo apni jan ka bay masraf ziyaa kabhi nahi chahita tha.
Shahadat ka khwab is ne bhi barsoon say dekha tha. Lakin Kargill ki paharriyun par fatha k alam garray bagair wo shahadat say sarfaraz hona nahi chahita tha.
Apnay sathion aur Post par alwidai nazar dali aur phir ek naay azam o iradeh k sath Post say nikal kharra hua.... is k nikalne k kuchh deir bad hi Indian army k kuchh ahalkaraon ne Post par qabzah jama liya aur shaheed ko bhi apnay tasruf may lay liya.
********************************

Captain Colonel Shair Khan ne hi set k zariay Captain Rehman ko ittala de thi kih Kashif Post par dushman ne qabza kar liya hai.
Captain Rehman ko jahan Lalak Jan aur degar sathion ki shahadat ka dukh tha wahan usay Kashif Post hath say nikal janay ka dukh bhi tha.
Is say agli raat Indian army ka koi operator Pakistani Sipahion k kilaf galeez qisam ki galiaan bak raha tha..... kabhi kabhi jay hind aur kabhi kabhi pakistani mundio k naray alaapta tha..... Captain Rehman ne bar’ha yih shub suuni thi is liye usay is operator par bapanah gussa aa raha tha. Is ne barri mushkil say is Post ka suraag lagaya jahan say wo operator ruzoana taish delaya karta tha.
Agli raat k keesi phar Captain Rehman ne is Post par maujud Sipahion ko thakanay laganay k program banaya aur char sathion k hamrah lay kar is Post ki janib barrhnay laga.. Taqriban ek ghantai bad wo “ Hind Post” k sir par tha. Jahan say wo operator galeez zaban istamal kar raha tha.
Captain Rehman ne charoon taraf say Post ko gahra aur is qadar khamoshi say attack kya kih Post par maujud operator simt saat Sipahion ko gannay uthnay ka mauqqa bhi neh mila ..... Hind Post k itraaf may Indain army ki du Postain thian.. jahan say Hind Post ko barrhi aasaani say hit kiya jata tha.
Lakin......
Is k bawujud Captain Rehman ne is Post par qabzah kar liya.
Hind Post ab Rehman Post may tabdeel ho chuki thi.. apni pichhli Post say is ne mazeed sathion ko la kar is may qabiz karwaya aur supply line bhi tarteeb de.
Aanan fanan yih ittalaa ittaraf ki Postoon tak pahounch chuki thi kih Captain Rehman Hind Post par qabzah kar chuka hai ab is say Post khali karwana joaay shair lanay k mutardef hai.... unhoon ne chher chhar karna gawara nah kya aur chup sadh li......
Lakin
Is khadshay ko unhoon ne kabhi nazar andaz nahi kya tha kih Captain Rehman say Post khali karwana na’guzeer hai warna Hind Post par qabzah kar sakta hay to in tak pahunch bhi is k liye na’mumkin nahi hai.....is ne agli Postoon tak signal baij diya tha kih Captain Rehman Taqriban in k andar guss chuka hai.... is k aglay ruz bad hi Bharati fazaiah k 20 Mig tiayyaroon ne Rehman Post k upar parwaz shuru ki thi.... aur jab in ki position ban gai to unhoon ne upar say barud barsana shuru kya.
Khuda ka karam dekhkiay kih Rehman Post qata’i gola bari ki zad may nah aai.... Captain Rehman ne mamuli aslah k sath bhi 20 Mig tiayaroon ko panapnay nah diya aur bala aakhir taiyaroon ne namurad ho kar parwaz bund kar de... Captain Rehman ki khoish thi kih keesi taraah artillery fire k zara’i paida karay. Lakin is ka derinah khwab pura honay ko nahi aa raha tha... phir bhi mamuli aslah k sath is ne dushman ko qabu kar liye tha.
July ka wast tha.
Maidani ilaaqaon may garmi urooj par thi..... Captain Rehman Kargill ki sab say unchi paharri par qabiz tha. Hasb-e-mamul darjah hararat munfi 60 digree par gira hua tha.....
Is ruz achanak Rehman Post par jharap ho gai aur yih musalsal tin ratoon tak jari rahi aur yih tin ratain musalsal kantoon ki saij par jaagtai huay guzar gaian. chothay ruz Captain Rehman ko kilaf mamul halka bukhar ne aa liya. is ne is ko gahra nahi liya aur musalsal Post par apnay jawanoon k sath qabiz raha yahan tak kih is ne apnay satheion ko bhi mahsoos honay nahi diya kih usay bukhar hay.
Lakin.....
Panchwain ruz aur chhatai ruz usay shadid tap charr gai jis say is k chahray ki rangat hi badal gai thi...satheion ko tashwish ho gai aur du sathi Captain Rehman ko Post say nechay lay kar chalay gaay. In k badlay Hawaldar Major Inayat Shah ne tin satheion k sath aa kar Rehman Post par kaman sambhali . Keesi mahfooz Post par la kar Captain Rehman ko first aid diya giya lakin is say afaqah nah hua to Captain Rehman ko keesi khadshay ki bina par Galtri rawanah kya giya.
Jis takleef deh safer aur halaat may Captain Rehman ko Galtri pahunchaya giya wo khasi makhdush thi. Yahan pahunchahnay k fauran bad hi Captain Rehman ka baqaida ilaaj shuru hua..... aur kuchh dino bad hi wo mamul par aaya.
Ek ruz wo apni rank k keesi officer k hamra keesi chhoti si jheal numa talaab k kinaray baitha hua tha kih keesi Sipahi ne la kar is k hath may ek ruqqa thama diya.... ruqqa hath may lay kar Captain Rehman ki dharkan taiz ho gai thi. Is ne ruqqa khola to batool bhabi ki likhi hui thareer thi. Is say phalay kih wo khat parrhna shuru karta is k sath baitha hua Captain Amir bola.....
“ Lagta hay hamari bhabi ko shiddat say yad aay ho.”
Is ki bat suun kar Captain Rehman muskuraia aur jawab diya.
“ Wasay to tumhari honay wali bhabi is waqt London may baithi hui hain.”
“To goya wo London say luftandoz ho rahi hain aur tum Kargill ki khak channay aay ho. Zulam nah karo yar is bachari k sath.”
Captain Amir ne taffunnan taba k liye kaha.
“ Wo khalis London ki paidawaar hai. Lakin is ki sab say barri khubi yih hai kih islam ki maqsidiat aur afadiat k hawalay say ham say zada jaanti hai ..... khas taur par usay mera profession bhi bahut pasand hai.”
Captain Rehman ne wazahat kartai huay kaha
“Any how tum khat parrh lo,may kuchh zaroori intizamaat karwana chahita hoon .”
Yih kah kar Captain Amir utha aur camp ki taraf chala giya...... Tab Captain Rehman ne khat dubarah khola to is k dil-o-demagh may ek lateef see thandak wadiyiat hui thi....
Is ki Bhabi batool ne likha tha.
Piyaray Rehman
Jab kabhi mujhay tumhara khayal aata hai to Fakhirah k zahan say tumharay mutalliq sochnay lagti hoon to mujhay ahsas tafakhar sa ho jata hai kih Fakhirah ki wajah say tumhain may ne khud say aur zada qarib kar liya hai.
Khair in batoon ko rahnay dejiay, ham ne tum say phone par rabitah karne k liye barha koshish ki lakin har bar yahi bataia giya kih tum jahan ho wahan set k system bhi maujud nahi hai. Tab may ne khayal kya kih keesi khat k zariay he tumhari khairiyyat daryaft karoon ... mujhay ahsas to nahi hai kih jin halaat ka tum samna kar rahay ho is dauraan tumhain yih khat hath lagta bhi hai ya nahi......
Mujhay yih ahsas bhi hai kih khat nah janay kin kin hathoon say guzar kar tum tak pahunch jaay ga aur tumharay profession k log usay parrh kar tumharay baray may kya ra’ay qaim karain gay.
Lakin......
Is sab k bawujud raat k is suunharay mauqqay ko may gunwana nahi chahiti.... London say aay ruz Fakhirah mujhay phone karti hai aur kahti hai kih Rehman say rabitah hua hai ya Rehman ne rabitah kia hai....? Usay Kargill k halaat ka sab kuchh ilm hai. Alimi media ka raddeh amal Kargill issue ko barri bareek bini say ushal rahi hai.... usay yih bhi malum hai kih aa ruz Kargill say saikroon na’eshian uth rahi hain.
Tum samaj saktai ho Rehman , in halaat k pesh-e-nazar Fakhirah k kya jazbat hoon saktain hain? wo aay ruz ek naay ahsas k sath phone karti hai aur is ruz to phone par hi phoot kar roai kih ne janay tum kasay ho? wo tumhari kamiyabi aur sahatyabi k liye har namaz k bad dua mangti hai.... tumhain yih khat liknay say kuchh deir phalay hi is ne London say phone kia tha... wo khasi bachain lagti thi... may ne pochah to bataia is ne tumharay mutalliq ek khwab dekha hai.... is ne mujh say khwab ka zikar to kya lakin may yahan baiyan nahi kar sakti. Lakin yih khwab dekhnay k bad wo aur zor shor say tumhari wapasi ki duain mang rahi hai.... is k andar yih jazbah keyun karfarma hai is ki hiddat may baja taur par mahsoos karti hoon.... mujhay kahnay deijay Rehman kih apni guftugu katam karnay say phalay Fakhirah ne keesi jazbati amal k tabay nahi balkah mukamal hosh o hawas may kaha tha kih wo tum say muhabat karti hai...... Shaila tumhain muhabat k jo darjay samjha chuki hai wo in tamam darjoon ko ubur kar k junoon ki had tak pahunch gai hai...... aur phir yahan say aagay jaza aur fana k rastai nazar aatai hain.....
Kaash yih mumkin hota kih may Fakhirah ko iztirab may dekhney say phalay tum dunoon k darmiyan koi azduwaji haisiyat qaim karti..... may chahiti to thi lakin tum ne head quater say aane walay hukum ki timil ki aur chalay gaay.... Ammi jan aur may ne jo khwab dekha tha wo dhara rah giya.
May khud ko Fakhirah bana ka mahsoos karoon to mujhay yaqeen hai tum maidaan karzar say fatha ka sahra saja kar wapas aao gay aur phir yahan aao gaay to tumharay sir par ham nabhah ka sahra saja dain gay....
May khud yihi khwab dekh rahi hoon aur Fakhirah tumhari muhabat aur wapasi ki umeed may sajdeh say sir uthane ka nam nahi lati..... is ki is jazbay say mujhay ahsas hota hai tum duno ek dusaray k liye lazim-o-malzum ho...... aur Khuda k haan is iztirab ki jaza zaroor hai......
Khat ka ikhtaitam karne say phalay tin batain aur batati chaloon gi .... Shaila ko to tum bahtar jantai ho, is k bhi kabhi kabhar phone aatai rahtai hain. Jab bhi phone karti hai tumharay mutaalliq zaroor puchhiti hai. Pata hai ab is k damagh say bhi magrabi taqleed ka rujhan zameen bose ho chuka hai aur wo khud ko Fakhirah k kirdar may dhalne ki koshish kar rahi hai.... khayti hai meri kamiyabi k liye dua karo. Yih sab tumhari waja say hua hai is liye may tum hi say guzarish karti hoon kih is ki kamiyabhi k liye Khuda say zaroor dua karna.
Dusari bat yih kih Marvi Dikshat ne bhi du bar phone kia tha. Is k dil ko yih sadma pahuncha hai kih jo socha tha nah ho saka, lakin tumhari aur Ajay Vardha ki salamti k liye is ki film may kam karne ka wada kia tha aur wo shiddat say tumharay sath barah-e-rast rabita karne ki koshish kar rahi hai.... pata hai is bat k liye bhi wo dua karti hai kih tum sahih salamat wapas aa jao.... ta kih is ki film may kam kar sako aur wo tumharay zariay aur zada popular honay ka khwab dekhay.
Batao Rehman kia tum ne mahsoos kia jo bat mujhay sab say phalay batani chahiay thi wo may sab say aakhir may keyun bata rahi hoon? Bazahir to is k liye may ne char safhaat ka sahara liye hai. Phir ab may aakhiri bat batati chaloon kih yehan ham sab khairiyyat say hain.... aur sab hi afraad hi tumhain miss kartai hain. Pata hai tumhari bhatiji Shazli kal muj say puchh rahi thi. “Mama chacho kab aayain gay? Mama chacho kab aayain gay?” may ne puchha “ keyun” to kahne lagi “ chacho bahut piyaray hain.”
Suuno Rehman tum sirf Shazili k liye nahi sab k piyaray ho.Tumharay dam say hi bahut log jeetain hain aur jeeain gay... Hamari dua hai tum khush salamat raho.... aur yih dua bhi kih tum wapas aao lakin fatha ka sahra mathay par saja kar.”
Faqat tumhari Bhabi Batool
Captain Rehman ne is khat ko sirf ek bar parrhne par iktifa nahi kar leya tha balkah kai bar parrh liya tha lakin is ki lazzat mahv nahi ho rahi thi aur usay bar bar parrhtai rahne ko dil chah rah tha. Is kaht say phalay wo ghar k tamam afraad ko bhol chuka tha . Bimari k dauraan bhi is k zahan may sirf ek bat gardish kar rahi thi kih dushman is ki Post par qabzah karne ki jurrat nah karay....
Ab is khat ne is k samne ghar ka naqsha khol kar rakh diya tha. aur wo apne bahtijon aur bahtijion say piyar kartai aur wasool kartai huay nazar aa raha tha. Jab tasawur may wo in say khaltai kudtai aur piyaar kartai thak giya to dubarah Galtri k nasheab-o-faraz may loat aaya. Is ne ek bar phir barri chahat k sath khat ki janib dekha aur panchwi bar khol kar parrhne laga kih Captain Amir keesi taraf say namudar ho giya.
“ Ab bus bhi karo yaar.... kab tak parrhtai jao gay? kafi deir say dekh raha hoon . yun hi parrhtai ja rahay ho. kia koi khas bat hai?”
Captain Amir ne aatai hi sath wali chitan par baithtai huay kaha. Jis par Captain Rehman muskuraia aur kaht simt kar jaib may dal liya. phir bola.
“ Haan yar bahut khas bat hai. char dafa parrhne k bawujud dil nahi bhara.”
“ Its ok . yihi maray sath hota hai.... Any how yar may Chlam ja raha hoon ,kia company diy saktai ho?” Captain Amir ne amdam bar-e-matlab (coming to the point ) kaha.
“Lakin yar kal may har surat may Shewok jana chahita hoon... may yahan mutmain nahi hoon”
Captain Rehman ne apna iztirab bayaan kia.
“ Relax yar , is waqt tum lambay safer k qabil nahi ho... shukar hai Chlam qarib hai..... tum aana chaho to aa saktai ho.... sahat may tabdili aa jaay gi.”
Captain Rehman ne kah diya lakin Captain Rehman mahsoos kar raha tha Chlam janay say Shewok jana hi bahtar hai. Phir wahan say ek muktasir waqfa lay kar wo Tiger Hills pahunch sakta tha. Jab is ne Captain Amir ko apna program bataia to is ne is k faisalay par has’sad kar liya aur musafah k bad uth kar chala giya.
Is k janay k bad Captain Rehman ne jaib say dubarah khat nikala aur ek dafa phir parrh liya. Is khat ne usay itna mahv kar diya kih waqt guzarne ka ahsas bhi nahi ho raha tha.
Jabkih sham ka zard sooraj talaab k paani may jhilmil jhilmil kar raha tha.
Jis waqt Captain Rehman talaab k qarib say uth kar camp ki taraf giya ain usi waqt sooraj duar ufooq ki paharion may gurub ho raha tha.
******************************
Raat ko Captain Rehman ne Tiger Hills janay ka hatmi faisalah kar liya tha.
Subh ka zub k bad jab wo janay ki taiyarioon may musruf tha to Captain Irshad is k qarib aa kar bola.
“ Sir aap waqiah Tiger Hills jana chahitay hain?”
“ Sirf jana hi nahi chahita balkah tumharay samnay janay ki taiyari kar raha hoon.”
Captain Rehman ne jutoon k tusmay bandhtai huay jawab diya.
“ Wasay mazaq may kihh duoon to app ek barra mauqa lose kar raay hain.....Aap chahain to is mauqay say faidah utha kar ghar ja saktai hain.... This is a golden opportunity to go back.
Captain Irshad ne dili taur par Captain Rehman ko parakhna chaha.
“ Mat banu yaar” Captain Rehman ne is k kandhay par ek chapat raseed kar de. “ May ne tumhari taraah kabhi aysay mauquoon ka intizaar nahi ki hai...... Kargill war ko may ne apna farz samaj kar join kar liya hai.... aur kal k khat may ghar say yih likkha giya hai kih tumhari kamiyabi ka sahra mathay par saja kar wapas ghar lautoon.... may ne jana hai yar is dafa may yaqeenan Tartik aur Taikichi par bhi qabzah kar loon ga Inshallah.”
Yih kahh kar wo khaimay say bahir aaya. Captain Irshad bhi is k hamra tha.
Bahir thandi thandi hawa chal rahi thi.
“ Itna risk na lo sir!! hamay filhal aap ki zaroorat hai... Ham Rehman Post par bhi aap k qabzay say mutmain nahi hain... ek sathi kih raha tha daaen baaen say targit par ho, dushman ko keesi bhi waqt taish aa sakta hai.”
Captain Irshad ne bahir aa kar bhi apni guftugu jari rakhi .
“ Dushman k gharr may rah kar unhain lalkarnay may bahut maza aata hai. Tumhain pata hai adventure zindagi mujhay wasay bhi pasand hai.... is may risk layna hi parray ga.”
Captain Rehman ne apna gun check kartai huay kaha.
“ Wasay hamay itna kamzoor mat samjhain sir , ham bhi keesi kam k hain.”
Captain Irshad ne dil lagi k liye kih diya.
“ Wo to may samajta hoon lakin kabhi is ka amli muzahira nahi kia...”
Wo batoon may masruf thay kih keesi janib say ek Sipahi ne aa kar unhain salute kia aur kaha.
“ Sir , Group taiyaar ho chuka hai..... aap ka intizaar hai.”
Is ki bat suun kar Captain Rehman ne Captain Irshad ki taraf dekha aur bola.
“ Achchha sir , mujhay duaoon may yad rakhain.
Is k bad duno baqaida galay milay, jab Captain Rehman chal kar group k pass aaya to janay waloon ko rukhsat karnay k liye taqriban sarray Sipahi kharray thay. Yun sab ne fardan fardan Captain Rehman aur janay waloon say musafah kia aur unhain rukhsat kar diya.
Kuchh deir bad Captain Rehman ki kamaan may bees jawanoon par mushtamil ek group Gomah Lomah ki paharrion ki simet mahv safer tha.
Gomah Lomah may phalay hi Captain Rehman ki aamad ki ittla de gai thi.
Jis waqt wo apnay sathion k sath Goma Loma sector pahuncha to NLI k jarri jawaan is ki aamad k muntazir thay.... unhonay ne aanay walaoon ka achchha khair maqdam kya. Tamam sathi khairiyyat say pahunchay thay lakin thakay manndah thay....
Galtri say aanay walay group ne Gomah Lomah tahairna tha jabkih Captain Rehman ki khoish thi kih 10 NLI may say ek group nikaal kar aglay ruz hi Tiger Hills rawana ho jaay.
Lakin......
Sector k incharge Major Durani Captain Rehman ki sahat par bazid raha kih tin charr ruz tahair jaay.Tab Captain Rehman ko majburan usay k hukum par sir tasleem kham karna parra . Lakin andar hi andar is ka iztirab barrta raha aur wo yahan ek pal chain mahsoos nahi kar raha tha. Halaankih Giltri say yahan pahunch kar is ki tangoon may fouri taur par dard sa jag giya tha is k bawujud is ki khoish thi jald az jald apni Post par pahunch jaay.
Gomah Lomah may Captain Rehman ko du ruz ho gaay thay kih tesaray ruz raat k khanay say farigh ho kar wo aur Major Durani qahwa pe rahay thay kih Subaydar Hashmat Khan in k darmiyan aa giya. Wo kuchh udas sa lagta tha aur chahray bhi khasa murjhaya hua lagta tha...wo unhain dekh kar chand second tak to keesi kashmakash may mubtala raha jab duno officeroon ne istiffamiyyah nazroon say is ki janib dekha to is ne apnay laboon ko jumbish de.
“ Sir , ittla aai hai, Captain Colonel Shair Khan aur Captain Ejaz shaheed ho chuk hain?”
“ Kya?”
Dukh aur ranj say duno officers apnay cup rakh kar bayakwaqt uth chuk thay.
“ Pagam maynay khud note kya hai sir, Hawaldar Rehmat ki tasdeek par operator Rasool Mir ne Hasnaan Post say yih ittla bhaiji hai.”
Captain Rehman aur Major Durani ne khamoshi say is ki bat suuni, uhhain khabar ki sadaqat ka yaqeen nahi ho raha tha.
Lakin.......
Yaqeen karne k illawa koi charah nah tha. kuchh deir ki khamoshi k bad Captain Rehman ne apnay Ansu pounchay aur Major Durani say mukhatib ho kar bola.
“ Sir , Ab to mujhay janay dain, yahan mari itni zaroorat nahi hai sir, mujhay Tiger Hills bhaij dain. May ne Colonel Shair Khan aur Captain Ejaz ka haq ada karna hai..... mujhay bhi in ki manzil ko pana hai sir, mujhai bhaij dain. Please.”
Major Durani, Captain Rehman k jazbay say maruab ho chuka tha.Is ne Captain Rehman k kandhay thapthapay aur asbaat may sir hila kar tasdeek kar de.
“ Tum ja saktai ho Rehman, Tumhari waqiah yahan zaroorat nahi thi aur may ne tumhain roak kar barri ziyadti ki hai jao Rehman , apna farz nibhao, tumharay pechay may bhi chala aao ga, Captain Colonel Shair Khan , Captain Ejaz aur Hawaldar Major Lalak Jan jasay saputoon ka apni asli manzil ki taraf chalay janay k bad yahan say mara dil bhi ukta chuka hai.”
Is ne dubarah iqrar may sir hilaya aur ansu pounch liye.
Aglay ruz Captain Rehman pachas Scouts ki kamaan may Tiger Hills rawana ho chuka tha jahan mukamal taur par jang ka pansa hi badal chuka tha.
“ Rehman Post” dubarah “Hind Post’ may tabdeel ho chuki thi. Tiger Hills pahounchanay k aglay ruz bad hi Captain Rehman ne chand sathioon k zariay “Jarrar Post” say Hind Post ki janib pesh qadmi ki wo apnay aap say ahd kar chuka tha kih Hind Post ko ek bar phir Rehman Post may tabdeel karay ga.
Issi azm-e-sumem k sath is ne is ruz aachanak Hind Post par hamlah kar dea aur is k parakchay urrah kar rakh deay. Aglay du ruz bad Rehman Post ka wujud dubarah zinda kar chuka tha. aur daaen baaen maujud Postoon tak yih ittla pahouch chuki thi kih Captain Rehman dubarah namudar ho chuka hai aur chand Post par qabzah bhi kar chuka hai . is khabar ne unhain mazeed bokhala dea tha aur unhain apni jan k lalay parray thay.
********************************

Is ruz Captain Rehman ek naay imkaan par gaur kar raha tha.
Daaen taraf maujud “ Ajay Post” target say zada duur nahi thi. Raat ki tareeqi may wo is par qabzah karne ka khwab dekh raha tha.... Is par qabzah karnay k bad wo Baaen janib maujud “Shankar Post” ko aasani say hit kar sakta tha. keyunkih wo bilkul samnay aur satah par thi.
Is ne is say aglay ruz reki k zariay hamlah ki juziat malum kian aur is say bhi aglay ruz wo raat ki tariki may “ Ajay Post “ ko nest-o-nabud karnay k jazbay say mukhtalif arr layta hua chh jawanoon ki kamaan kar raha tha.
Jis waqt wo apnay jawanoon k sath “ Ajay Post” ki ittaraf may pahuncha to faza may mukamal sukutt tari tha. duur kaheen say dhamakoon ki awazain aa rahi thian jabkih aspas faza khamosh thi....Captain Rehman apnay sathioon ko in ki positionay samjha chuka tha. Ab wo khud night vision k zariay Ajay Post ko talash kar raha tha jo barf ki thh may barri maharat k sath banai gai thi.
Captain Rehman ko aas pass Ajay Post ki maujudgi ka ahsas tha.
Lakin......
Night vision k zariay kafi koshish k bawujud usay target hit karne k liye koi wazay nishan nahi mil raha tha... is ne ek hi jagah tahair kar time zaya karna gawara nah kya aur barri ahtiyat say idar udar crawling kartai huay Post ki juziat malum karne laga.
Jab is musalsal koshish may usay koi umeed nah budhai to usay ahsas hua wo Ajay Post say hat kar keesi aur muqam par aaya hai..... jabkih usay raat ki tariki may kuchh andaza nahi ho raha tha.
Lakin .......
Dil hi dil may yih faisala atal ho chuka tha kih Ajay Post ko tabah kiay bagair nahi jaay ga.... wo is jazbay say crawling kartai huay daaen taraf barrnay laga , night vision k zariay idar udar dekhta bhi jata tha.
Ab wo crawling kartai kartai barf ki gahri khai tak pahuncha tha. jab sai la hassil hui to wapas murrnay laga tha kih qarib say he firing baland ho gai..... is firing say Captain Rehman k dil may ek hi ahsas ja guzain ho giya tha...yehi kih wo sab dushman ki range may aay huay hain. Is naay ahsas k sath wo crawling kartai huay apnay sathion tak pahuncha jo muktalif aarr may chupay huay mustaid thay.
Firing dubarah shuru ho gai lakin barri shiddat aur wahshat k sath . in halaat ki waja say Captain Rehman k samnay sirf ek hi bath mad-e-nazar thi.
“ Defa”
Wo karray say karray lamhaat may farrar ka rasta akhtiar karne waloon may say nahi tha....... Ab bhi is ne is ahsas ko balaay taaq nahi rakha tha kih kilaf-e-mamul anpnay sathioon k sath wo dushman ki hisaar may qaid hai. Is ne Position tabdeel ki aur phir fire par fire daagna shuru kia. keesi ko bhi apnay target ka ilm nahi tha.
Lakin .....
Dashshat phalanay k liye jawab dena naguzeer tha.......
Captain Rehman ki yih koshish thi kih dushman k hissar say bahir nikal kar in par war karay.... usay ammunition ki kami ka ahsas tha is liye andha dundh firing say ahtraaz bartna chahita tha. Is liye waqtan fa waqtan firing ka jawab detai huay apni jagah chorr kar duur hatna shuru kya tha.... Abhi is ne kuchh hi fasala tai kya tha kih ek pura burst is kih daaen taraf aa laga aur wo apni jagah par jam kar rah giya . Is k bad firing ka tasalsul jari raha jabkih Captain Rehman ko ahsas ho raha tha na janay kis galti ki padish may wo dushman k garrh may buri taraah phans chuka hai nah daaen ja sakta hai nah baaen nah pechay aur nah aagay.
Marnay aur maarnay ki lamhaat qarib aa chuk thay......
Captain Rehman dubarah sathiyoon k pass aaya aur unhain barri jiddo jahd say ek taraf lay janay may kamiyab ho giya tha lakin qarib say itni shiddat say firing hui kih is k du sathi mauqay par shaheed ho gaay. Tab zindagi may phali bar Captain Rehman ko apni babasi ka ahsas ho giya tha.
Lakin ........
Uss k bawujud is ne apnay aap ko mayus nahi kya aur ek naay jazbay say baqiya sathion ko lay kar ek nai simt crawling karne laga...... kuchh hi aagay giya tha kih usay ek barf k gahray garhay k aasar dekhai diay... ab aagay barrhna mahaal tha.
Faisala hua ma’ni ma ma’ni dushman k garrh may hi in say uljha jaay.... Wo sab Captain Rehman ki taraah pur umeed thay kih fatha ki arzo puri nah hui to shahadat ki sa’adat zaroor hassil ho gi. Unhoon ne apni gunnay sedhi kian aur fir aanay ki simt andazay say fire daagna shuru kya. aur jazbaat ki aakhiri dehleez par qadam rakhay yih ek dusaray say itnay duur hotai gaay kih tariki may ek dusaray ka nishan nah mila.
Waqt lahza bah lahza guzar raha tha.
Ajay Post ka Captain barrh ghag tha. Is ne Captain Rehman ko burri taraah uljha kar rakh diya tha aur ab mukamal taur par usay apnay hissar may lay chuka tha....
Raat ki tariki say is ne bharpur faiada uthaya tha aur ab subh ka intizar tha ta k raushani may wo taak kar nishana lay sakay....is azam k sath wo andha dundh firing say ijtanab karta tha aur jab Captain Rehman apnay baqiya sathion k sath hissar torrnay ki koshish karta to is mauqa par ek burst mar kar dubarah hissar k andar laya jata tha.
Faza ki tariki may ab maut raqsaan thi
Waqt guzarne k sath lamhah bah lamhah tariki bhi chatna shuru ho chuki thi.
Captain Rehman mayusi ki aakhiri had may bhi pur umeed tha. aur yih soch raha tha shahadat to yaqini amar hai. Ajay Post par qabzah nah bhi kar saka to kuchh nah kuchh zaroor kar guzray ga.... is jazbay ki hiddat may is ne ek position may rahna gawara na kia aur idar udar , daaen baaen rangta raha..... is alam may is ne barf par kai lashoon ko parrhay huay mahsoos kyia.... wo is bat par bhi khasa mutamin tha jahan is do tin jawaan shaheed ho chuk hain wahan wo Ajay Post k chand Sipahioon ko bhi maut k ghatt utar chuka hai.
Waqt guzarne k sath sath aakhir wo lamhah bhi aaya kih andhara abhi mukamal chhata nahi tha lakin duno harifoon ko ek dusaray ki position ka ahsas hua aur is qadar firing honay lagi kih barf posh paharrian tharra gaian aur faza ka sukutt aachanak darham barham ho giya.
Khuda ka gaibana sath tha kih Captain Rehman aur is jawanoon ko dushman k garrh may gahray rahnay k bad kuchh aarr mil gaay aur unhoon ne taak taak kar target hit kya.
Lakin ......
Ajay Post ka Captain bhi fatin qisam ka officer tha. Is ne apna painthra badla aur keesi aqbi muqam say Captain Rehman k ek jawan ko nishahne par bandha....ab Captain Rehman ko sirf tin jawaonoon par kamaan karna tha..... wo bhi hama waqt is k isharay par kat marne k liye taiyaar thay.
Ajay Post k Captain ko bhi mauqay ka intizaar tha wo is mauqa say kuchh hassil nah kar saka... Subh ka zab numudar ho chuki thi lakin ab tak wo dushman ka qalaqama nahi kar saka tha.Jis waqt wo apni gun may naaya magzine dal raha tha. Is waqt is k kuchh fasalay par hi firing ho gai. Is ne chonk kar apnay baaen taraf dekha to is k du Sipahi zameen bose ho chuk thay. Jab is ne aarr may say zara sa sir nikal kar bahir dekha to usay ek Pakistani Sipahi musalsal firing karta hua nazar aaya... wo apni aarr say is qadar bahir aaya tha kih Hindu Captain aasani say usay nishane par lay sakta tha. Captain ne is Sipahi may itni lachak aur maharat dekhi kih wo apna pantara badal kar aysay fire daagta tha kih koi bhi usay nishane par nahi lay sakta tha jabkih wo khud is k kai jawanoon ko chsham-e-zan may zameen bose kar chuka tha. Hindu Captain ne apni gun load ki aur is Sipahi ka nishana bandha aur barri maharat k sath is waqt ek pura burst mar diya jab Sipahi ka magzine firing kartai kartai khali ho chuka tha aur wo dubarah apni aarr ki janib lapakne k liye murra tha.
Captain Rehman ne apni aarr say apni sathi ki shahadat ka manzar dekha..... jab is ne daaen janib apne aakhir jawaan ko dekha to wo is say bay khabar dushman ko nishanay par baitha raha tha. Jis say Captain Rehman ko barri khushi hui.... ek naay azam k sath wo apni aarr say bahir nikla aur phalay walay sathi ka amal dhuraya. Hindu Captain ne apni aarr say lamhah k liye sir bahir nikal kar dekha aur phir muskura kar rah giya. keyunkih nihaayat sazgar mahual may Captain Rehman is k nishanay par aa raha tha.
Is ne apni gun may ek naaya magzine bhara aur aarr say hat kar Captain Rehman ko target kar raha tha kih aachanak lablabi dabanay say phalay is ka dil qudrati taur par laraz giya aur jism ne ek jhurjhuri si li......
Wo is officer ko pachan chuka tha.
“ Captain Rehman”
Is k dil-o-damagh may in alfaz ki takrar gounj gai. Aur tamam maslahatoon ko balaay taq rakh kar wo apni aarr say uth karra hua aur gala pharr kar bolaq.
“ Rehman..... Rehman.... may Ajay Vardha hoon.... Ajay Vardha...... firing bund karo Rehman.... Rehman”
Dusaray hi lamhay keesi ruhani taseer k taht Captain Rehman ne fire band kar diya aur mechinical andaz may murr kar dekha to kuchh hi fasalay par is k London ka jigri dost aur Marvi Dikshat ka mangetar Captain Ajay Vardha karra tha....Captain Rehman usay dekh kar bounchka rah giya...... is ne dekha Captain Ajay Vardha khali hath karra ho chuka tha. jabkih is k hath abhi tak gun maujud thi aur barud bhi tawaqqu k mutabiq maujud tha...... is k dil may ek second k hazarwain hisay may khayal aaya kih apnay profession ki laaj rakhay.
Lakin.........
Is ne mahsoos kya kih is k hath aur bazoo jasay suun ho kar rah gaay hain. aur siray say is k hath may gun hi nahi hai.
“ Ajay...”
Ab wo ek naay ahsas k sath gun rakh kar uth karra hua..... jis par Captain Ajay Vardha ka dil musarrat say labraiz ho giya kih Captain Rehman usay nahi bhoola hai..... jis waqt wo Captain Rehman ko apnay senay say laganey k liye chand qadam hi aagay giya tha kih duur say jay hind ka narah baland ho giya aur is k sath hi ek burst aaya aur is ki kuchh goliaan Captain Rehman k senay k par ho gaian jo khud is azam say Captain Ajay Vardha ki taraf barrha tha kih apnay jigri dost ko banhoon may lay is ne qasam khai thi kih keesi bhi morr par wo usay apna dushman tasawwur nahi karay ga. aur keesi bhi muhaz k andar khud goli nahi chalaay ga jabkih Captain Rehman ki goli say marna usay manzoor tha.
Goliaan lagne k sath hi is ko ek jhatka laga aur wo duur ja gira.
“ Rehman.”
Captain Ajay Vardha ne ek cheekh baland ki aur duur kar Captain Rehman k qarib aaya. Usay zameen say uth diya aur fart-e-jazbaat say labraz ho kar Captain Rehman ko apnay senay say laga kar phot phot kar ronay laga.
“ Rehman .... maray dost. maray bhai.”
Is k sath hi kuchh hindu Sipahi is ki itaraf may jama ho gaay...... Captain Ajay Vardha ne unhain hath k isharay say duur bhaij diya.... is dauraan Captain Rehman ki aankhain mukamal band thian. Jabkih Captain Ajay Vardha usay jazbati kafiyyat may jagane ki koshish kar rahatha.
“ Rehman .... Rehman.”
Is ne Captain Rehman ko jhanjhora lakin wo nahi jaga tab mayus ho kar is ne Captain Rehman ka sir apnay senay say lagiya aur phot kar ronay laga.... kuchh hi fasalay may hindu fauji harait-o-astajab k alam may apnay officer k kilaf-e-mamul raddeh amal dekh rahay thay......
“Ajay”
Ronay k dauraan Captain Ajay Vardha ne ek sargoshi mahsoos ki..... is ne Captain Rehman ko khud say alag kia to wo apni aankhain khol chuka tha. fart-e-mahubat say Captain Ajay Vardha ne usay apnay senay say lagiya aur bicha .
“ Shma karo Rehman, shma karo....... yih sab kuchh achanak ho giya.... warna may tum par koi aanch nah aanay deta.... mujhay shma karo Rehman , may Sharamsar hoon tumharay aagay.”
Is ne dubarah Rehman ko khud say alag kya aur mahubat say is ka matha choam liya phir apnay ek Sipahi say mukhatib ho kar bola.
“ Vachar fauran first aid ka samaan lao.”
“ Nahi Ajay, may ek naay alam say wapas aaya hoon, dubarah wahan janay ka waqt aaya hai... mujhay first aid nahi chahiay.”
Itna kah kar is ne hichki li aur wo mazeed kuchh nahi bol saka.
“ Nahi Rehman, mujhay chorr kar janayki bat nah karo.... Jana hai to mujhay bhi apnay sath lay jao warna tumhain kuchh ho giya to is k bad may Marvi ka samna zindagi may nahi kar sakoon ga. Nahi Rehman , may Marvi ki halaat dekhnay ki jurrat nahi kar sakoon ga.”
Captain Ajay Vardha dubarah jazbati andaz may bola.
“ Is say kaho Ajay .... hamray chahnay say amn nahi phalay ga... sirf hamri dosti say .... Pakistan aur India.......kabhi ek dusaray k dost nahi ban saktai..... ijtamai jid o jahd ki zaroorat hai Ajay..... ijtamai jid o jahd.....”
Is k bad is ne dubarah hichki li aur aankhain band kar liaaaaaan
Captain Ajay Vardha ne mahsoos kya Captain Rehman k lab hil rahay thay aur keesi kalmay ki adaigi ka mamuli tassur paida ho raha tha.... Jis waqt MUHAMMAD UR RASOOL ALLAH k bad Captain Rehman ki gardan ek taraf dhalak gai.... Captain Ajay Vardha “ Rehman” pukar kar is qadar phot kar roya kih is k tamam Sipahioon ne gunay zameen par rakhian aur ahista say chal kar Captain Ajay Vardha k gird halqa bana kar jama ho gaay jabkih usay is ki khabar tak nah rahi aur wo is qadar zada rota raha kih is ki aankhain surk ho chuki thian.
Mukammal taur par subh ka zahoor ho chuka tha.
Lakin.....
Is k bawujud afaqi aasaman safaid badaloon may dhaka hua tha. Jis waqt faza may gahra sukutt tha ain is waqt faza , sirf Captain Ajay Vardha ki siskioon say labraiz thi........ phir siskioon may hi Captain Ajay Vardha bola......
Agar ham ne Kargill fatah kar liya tab bhi mujhay kushi nahi ho gi jitna kshat mujhay Rehman ki maut say mila hai. Rehman sirf mara dost aur bhai hi nahi aur bhi bahut kuchh lagta tha..... tum logoon may say jis ne bhi is par fire daaga hai to yeh samjo mujhay hi tum log qatal kar chuk ho. Jabkih Rehman ko kuchh nahi hua..... Rehman shanti aur annti ka aakhiri saharah tha lakin ham is saharay ko bhi kho chuk hain haan kho chuk hain.”
Is k bad Ajay Vardha ne Captain Rehman ko khud say alag kar k zameen par lita dea aur uth kar salute kia. Is k tamam jawanoon ne is ki taqleed ki, is k bad wo log Captain Rehman ko aarm k sath apni Post par lay janay k liye aagay hi jhuk thay kih ek taraf say “ ALLAH O AKBAR ka narah mastana baland hua aur is k bad firing ki itni bosharr hui k Captain Ajay Vardha simt koi bhi zinda nah bach saka......
In sab k zameen par girnay k kuchh deir bad jab faza may ek bar phir gahra sukutt chha giya to ek khai may say Pakistani fauj k das jawaan ubhray aur unhoon ne Major Daurani ki kamaan may fauri taur par Ajay Post par hamlah kar diya......
Captain Rehman k group ka aakhiri Sipahi, Major Dauraani aur tamam sathion ko Captain Rehman aur Captain Ajay Vardha ki sari kahani bata kar hariat zada kar chuka tha. Kahani suunne k bad jab Major Dauraani Captain Rehman ki naish par aaya to bay ikhtiar chalak parra kih
Captain Ajay Vardha, Captain Rehman k senay par sir rakh k hamesha ki nind soya hua tha. Aakhiri waqt bhi duno ne dekhne waloon ko piyar , dosti aur amn ki nishani chhorri thi.